سنه إله بیر شعر یازاجاغام کی / عزت طهماسبی

سنه إله بیر شعر یازاجاغام کی / عزت طهماسبی

 

سنه إله بیر شعر یازاجاغام کی
أته‌ییندن تؤکه شیطان داشی‌نی
آغاج‌لار دولوسو اوخویا قوش‌لار
ایته بو شَهَردن بایقوش باشی‌نی

سنه إله بیر شعر یازاجاغام کی
یئریشینه یول‌لار گؤزونو تیکه
قاپی‌لار بویلانیب دوواردان آشا
چینارلار دیزینی بویونا چؤکه

سنه إله بیر شعر یازاجاغام کی
اوخویوب سئوه‌سن اؤزون اؤزونو
یا دا بو شعر إله خوشونا گله
منه ده آچاسان بیر یول گؤزونو

سنه إله بیر شعر یازاجاغام کی
دورنالار پای توتا تئلیندن سنه
جئیران‌لار صف چکیب دوزده دایانا
بویلانا موغانین چؤلوندن سنه

سنه إله بیر شعر یازاجاغام کی
لالالار دیسکینه، نرگیز اویانا
اوخویوب‌ اوینایا سئوگیلی قیزلار
یول گئدن یولچولار یولو دایانا

سنه إله بیر شعر یازاجاغام کی
چرچی‌لر گووه‌نه اؤز ماتاهی‌نا
گلین‌لر آخیدا قیزلار قانینی
سئویلن اوغلانین قیز گوناهینا

سنه إله بیر شعر یازاجاغام کی
ناغیل‌لار آراسی بیته سئوگیمیز
گؤی‌دن یئر اوزونه اوچ آلما دوشه
یوخوسون راحات‌جا یاتا سئوگیمیز

اگر این مطلب را مفید ارزیابی کردید لطفاً به اشتراک بگذارید :