من‌دن ایراق! دونیالیق یئمک هابئله یوخسوللوق گونونوز شیرین اولسون.

من‌دن ایراق! دونیالیق یئمک هابئله یوخسوللوق گونونوز شیرین اولسون. / محمد حسن نژاد

 

اینانج‌لارا گؤره تانری دا یئمک‌دن اینجییب آدام بابانی جننت‌دن اؤتوردو إشیگه!

قونشولوغوموزدا بیر کیشی تانییرام قوجاغی منه پاییزی خاطیرلادار،  بوم-بوش أل‌لرله إوه گلنده دوروموم چوخ زور اولور نییه کی قازاندیغی یاشام یاماق‌لارینی زورلا اؤرتور گاه‌دان کوچه‌ده اوینایان اوشاق‌لارا حسرت دولو گؤزلرایله باخار، چوخ آجی چکر اوندا کی گؤرر اوشاق‌لار آتالارینین قوجاق دولو یئمک‌لرینه گولوش‌له قاچیرلار.‌

گؤزوم بو صحنه‌یه یول سالاندا دولوب ایسلانیرام، آتام‌لا نوبارلیق‌لارا تامارزی قالدیغیمیز گون‌لر خاطیرلانار، هیچقیریق بوغار منی…

کیم بیلیر هر گئجه نئچه شام‌سیز یاتان وار دونیادا و بوگون دونیالیق یئمک گونو صاباح دا یوخسوللوق، نه شیرین آجی‌دیر!

کئشکه یاساقلایایدیم یئمک رئکلام‌لارینی آزدیراردیم آجی دوشونجه‌لری، بیر آن‌لیق اولسا دا قالدیراردیم مافییا ایلگی‌لرینی!

هر گؤردوک‌ده ۷ یاشیمی آغی کیمی خاطیرلاییرام…

کرپیچ کوره لرینده چالیشان اوشاق‌لار قانادسیز ملک‌دیلر؛ اوخول اؤنونده دولانارکن اوشاق‌لارین  “من آجام دئیه” باغیرماق‌لارین إشیدیرم گؤزلریندن و چوخ اولسا أل‌لرینده بیر چؤرک پارچاسی وار روب یاخیلمیش هله او دا بخته‌ورلر چانتاسیندا…

 

من‌دن ایراق! دونیالیق یئمک هابئله یوخسوللوق گونونوز شیرین اولسون. / محمد حسن نژاد

اگر این مطلب را مفید ارزیابی کردید لطفاً به اشتراک بگذارید :