قادین‌لار گؤزللییین عؤمورلوک آنلامی

آمونیوز، گروه بانوان: یازارار سحربارانی ،قادین‌لار گؤزللییین عؤمورلوک آنلامی

 

 

 

قادین‌لار دونیانین رنگی، حیاتین معناسی و گؤزللییین عؤمورلوک آنلامی‌دیرلار. دونیانین اؤنملی ایکی‌یاری‌سیندان بیری‌دیرلر، بوتون اینجه‌لیک‌لرده قادین ایزی وار.
آنایلا باشلانیر یاشامین ایلکین نبض آتیشی، معنویتین تمثیلی‌دیر. انسانی دوشونجه‌ده، قادین-آنا دوغمالیق، دوغارلیق، معنوی سئوگی و آن باشدا وطن تورپاغینین تجلی‌سی‌دیر.
افسانه‌لرده قادین، کیشی‌نین قابیرقاسیندان یارادیلمیش کیمی‌قئید اولونسا دا، بلکه آناایمیش یوغرولوب انسان اولان تورپاق، جانینی روحونو وجودونو ائولادینا باغیشلاییب، سونرا یاشاتماسی، بسله‌ییب بؤیوتمه‌سی اوچون، قوجامان یئر کوره‌سینه چئوریلیب سیرتینا آلیب اونو. گره‌یینده قوجاق، گره‌یینده اوجاق اولوب. آنجاق کی، هر شئی‌دن اؤنجه، آنا-تورپاق یارانیب.

 

عصیرلر بویو،‌هاردان گلدیینی بیلمه‌ین، اورک گؤزونو بیر تهر آچا بیلمه‌ین بشر-کیشی، قادینا خور باخسا دا، آنجاق، اؤزونه قارشی دوردوغونو، اصلینده اؤزونه خور باخدیغینی حله ده آنلامیش دئییل. آخی تورپاق-آنانین بیر یوماغی‌دیر انسان.

نه یازیق کی جانیندان آیریلان جاندان حاققینی آلماق اوچون، مین‌لرجه ایل بویو ساواشماق مجبوریتینده قالیب آنا-قادین‌لار.
آنا-قادین گونو دونیانین هر طرفینده قوتلانسا دا، بو بیر گونو قازانماق ائله ده راحات اولمامیشدیر.

۸مارت دونیا قادین‌لار گونودور. دونیانین دؤرت طرفینده تؤرن‌لر قورولور، جشن‌لر توتولور و هر کس باشاردیغی دیلده قوتلاییر بو گونو. کیمی‌سینه سیاسی بیر آنلام‌دیر، کیمی‌سینه معنوی بیر دَیَر. اما ۸مارت‌ین تاریخچه‌سی ندیر و ندن قادینلار گونو عنوانیندا دونیا بیرلشمیش میللت‌لری طرفیندن قئید ائدیلیب:
اسکی زامانلار دونیا ایشچی قادین‌لار گونو آدلانان، دونیا قادین‌لار گونو، هر ایل ۸مارت تاریخینده گئچیریلن بیر تؤرن‌دیر. اؤلکه‌لره باغلی، تؤرنین اساس توجه نقطه‌سی، قادین‌لارین حقوقونون قورونماسی، سئوگی، یا دا توپلومسال، اقتصادی یا سیاسی ساحه‌ده الده ائتدیکلرینی قوتلاماق‌دیر.

۸مارت، ایلک اؤنجه سیاسی بیر اولای کیمی، آمریکا، آلمان بیر ده دوغو اوروپادا باشلاندی. سونرا بو اؤلکه‌لردن بوتون دونیایا یول آچماغی باشاردی. بونا باخمایاراق کی بو گون بعضی اؤلکه‌لرده سیاسی اؤنمینی ایتیریب، قادینلارا اولان سئوگینی ایفاده ائتمک اوچون سیرادان بیر مناسبته دؤنوشوب، سئوگی گونو و آنالار گونون تلفیقی کیمی‌بیر گون اولموشدور؛ اما حله ده بیر چوخ اؤلکه‌ده سیاسی و انسان حاقلاری اساسلی وجهه‌سی قورونماقدادیر.
بو گون، ایلک دفعه، ۲۸ فوریه ۱۹۰۹دا آمریکانین نیویورک شهرینده، ایشچی قادین‌لارین اعتصابینین ایل دؤنومونو قوتلاماق آدینا بیر تؤرن کیمی، آمریکانین سوسیالیست حزبی طرفیندن کئچیریلدی.

دونیانین فرقلی بؤلگه‌لرینده فرقلی گونلرده قوتلانسا دا، نهایت ۱۹۱۴جو ایلده دونیا قادین‌لار گونو ۸مارت، یکشنبه گونون‌ده کئچیریلدی و بوگونه کیمی‌ده هر ایل دونیانین بوتون مملکت‌لرینده ۸ مارت قادینا حصر ائدیلمیشدیر. ۱۹۱۴تاریخینه قدر هر‌هانسی بیر قادین باشلیقلی اعتصاب، تؤرن و یا اولای، ۸مارت تاریخینه ثبت ائدیلمه‌میشدیر.
۱۹۱۴ده لندن‌ده بیرینجی دونیا ساواشینا قارشی، سونرا دا ۱۹۱۷ده سن‌پطرزبورگ شهرینده ۸مارت گونو، ساواشین گتیردییی فلاکت‌لره اعتراض آدینا «باریش و چؤرک» شعاری ایلا بؤیوک تظاهراتلار اولموشدور. روسیه‌ده باش وئرن تظاهرات فوریه انقلابی‌نین باشلانقیجی‌دیر و دؤرد گوندن سورا روسیه تزاری استعفا ائتمیشدیر.
لئون تروتسکی بو حاقدا بئله یازیر:

۸مارت دونیا قادین‌لار گونوایدی، ییغینجاق‌لار و هر جوره ممکون اولاسی اولای‌لار قاباقجادان تدبیره آلینمیشدی، اما بیز بو گون قادینین انقلاب ائده‌جه‌یینی تصور ائله‌میردیک. انقلابی اولای‌لارین اولماسینی سئزسک ده زامانینی بیلمیردیک…‌هامی‌خیاوانلاردا توپلانمیشدیلار.
بو گونون روسیه‌ده رسمیلشمه‌سیندن سونرا چوخو کمونیست اؤلکه‌لرده ده رسمی‌لشمیش کیمی، قوتلاندی. باتی‌دا ایسه ایلک دفعه ۱۹۷۷جی ایلده قادین گونو، ۸مارت‌دا گئچیریلدی.

سون ایللرده، قادین‌لار گونو دونیادا یئنی بویوتلار قازانماقدادیر. قادین‌لار کیشی‌لرین مینلرجه ایللیک مطلق حاکمیتینه سون وئرمک، بوتون ساحه‌لرده ائشیت حاقلار قازانماق ایسته‌ییرلر. علمی، سیاسی، اقتصادی، هنری و … ساحه‌لرده باشاریلارینی تثبیت ائتمکله گونو گوندن لایق اولدوقلاری یئری قازانماق نائلیتینده‌دیرلر.

اگر این مطلب را مفید ارزیابی کردید لطفاً به اشتراک بگذارید :