باخیشینا قوربان اولوم آی آتا / عسگر عابدی (ایلقار)

باخیشینا قوربان اولوم آی آتا / عسگر عابدی (ایلقار)

 

باخیشینا قوربان اولوم آی آتا
گؤزلرینین سئوگیسینده باتمیشام
گؤی‌ده تانری، یئرده اونا تای آتا
گولوشون‌له غم کدری آتمیشام

داغ‌لار کیمی باشی قارلی دوروبسان
سوْرون‌لاردا سن فله‌یی یوروبسان
قوجاغین تک ایستی اوجاق قوروبسان
آتا دئییب کیم‌لیگیمه چاتمیشام

ساوالان تک بیزه دایاق خان آتا
دار حایاتین گئجه‌سینه دان آتا
یارامیزدان سس‌سیز آخان قان آتا
من دونیانی گؤزلرینه ساتمیشام

آردا قالان یاشامیم‌دا ایزلرین
قولاغیم‌دان آسیلی دیر سؤزلرین
سوْرون‌لاردا سارسیلمادی دیزلرین
یول‌لار بویو سوراغینی توتموشام

چینار-چینار یاز عشقی ایله دوزولدون
داغ دؤشوندن بولاق کیمی، سوزولدون
هردن سینیب، اؤز ایچینده أزیلدین
لال دردیمی نیسگیلینه قاتمیشام

 

اگر این مطلب را مفید ارزیابی کردید لطفاً به اشتراک بگذارید :