سونو دهشت اولدو سونو غم اولدو / اتابک تیموری «یورغون»

سونو دهشت اولدو سونو غم اولدو / اتابک تیموری «یورغون»

 

 

آغلایا آغلایا دونیایا گلدیم
دونیایا گلنده گؤزلر نم اولدو
کدرلی یاش گؤزلریم‌دن سوزولدو
سونو دهشت اولدو سونو غم اولدو

هر زامان بو دونیا زور گلدی منه
ایسته‌دیم دانیشام باشیما چالدی
ایسته‌دیم سسیمی قالدیرام بیر آن
حاییف کی بو آرزی ایچیمده قالدی

کئشکه دونیا چرخی ترسه دؤنردی
بیزه پای گلردی سئوگی‌له شادلیق
چالیب اوینایاردیق بیزلر ده بیر آز
اوندا بیلردیک کی نه دیر آزادلیق

گؤرمه‌دیم‌ عؤمروم‌ده بیرجه شن‌لی گون
گؤزومو آچاندان یاس‌دا یاشیرام
اؤز دردیمی هله اونودمامیشدان
چیینیمده دوست‌لارین دردین داشیرام

ایندی دوشونورم دونیام هئچ اولموش
من ده یاشاییش‌دا گوله بیلردیم
چکردیم دونیادا کئفین دادی‌نی
سونوندا یورولوب اؤله بیلردیم

اتابک تیموری «یورغون»

اگر این مطلب را مفید ارزیابی کردید لطفاً به اشتراک بگذارید :