نه سنی ساخلادی! نه منه قالدی! / عقیل مرادی “إلدار”

نه سنی ساخلادی! نه منه قالدی! / عقیل مرادی "إلدار"

 

سئوگیلیم! یارانان سئوگی عالمی
نه سنی ساخلادی! نه منه قالدی!
کؤنلومون آتشی، گؤزونون نمی
نه سنی ساخلادی! نه منه قالدی!

سئون اوره‌ییمین یاراسی درین
مرحمیم اولمادی قارا تئل‌لرین
ألیم‌دن اوزولن ایستی أل‌لرین
نه سنی ساخلادی! نه منه قالدی!

گئدیش یول‌لارینا تیکیلدی گؤزوم
دؤندو آغیت اولدو سئوگی‌سل سؤزوم
قلبیم‌دن قلبینه دولاشان دؤزوم
نه سنی ساخلادی! نه منه قالدی!

من‌دن اوس ایسته‌مه اولموشام دلی!
مجنونام! کرمم! سنی سئوه‌لی
حسرتی پای وئرن گؤروشون ألی
نه سنی ساخلادی! نه منه قالدی!

باخمادین”إلدار”ین اودلو آهی‌نا!
دئدین:” یانمالی‌سان اؤز گوناهی‌نا!”
یالواریش، یاخاریش عشق آللاهی‌نا
نه سنی ساخلادی! نه منه قالدی!

 

نه سنی ساخلادی! نه منه قالدی! / عقیل مرادی “إلدار”

اگر این مطلب را مفید ارزیابی کردید لطفاً به اشتراک بگذارید :