بۇراخین بو شهَر دیری دگیلمیش / کریم احمدیان “شاهد”

بۇراخین بو شهَر دیری دگیلمیش / کریم احمدیان "شاهد"

 

 

بۇراخین بو شهَر دیری دگیلمیش
اؤلومون قوخوسو توتوب هر یئری
دئپرم‌لر کوچه‌ده قۇمار اوْیناییر
شهَری بۇرۇیوب قارا بو سئری

یاغیش‌ دا سئومه‌ییر داها بیزلری
کؤچوبدور بۇلودون چیله‌مه‌ سسی
کوچه‌لر سۆکۇتا بویانیب قالیب
اینجیدیر آغ یئل‌ین سَرین أسمه‌سی

نه سس وار، نه هارای، بازار دا بوْم-بوْش
ماتیشکا ویترینده یالاندان گۆلۆر
آلیش‌لار وئریش‌لر اوْلوب باشقا شئی
شهَرده گۆلۆش‌لر دوداق‌دا اؤلۆر

أل‌لرده اۇتانیر تیتره‌ییر أسیر
چانتالار بوْشالیب ،اۆرک‌لر دوْلوب
قارا دیر ،سوْیوُق‌دو، خیاوان،‌ کوچه
نه‌دن’سه انسان‌لیْق بیر به بیر سوْلوب

سئوگینی ساتمیشیْق ، پارا آلمیشیْق
ایشیغیْن لذذتین نه‌دن آتمیشیْق
موْدئرنیزم یاشاماق سیندیریب بیزی
کلاسیک یاشامی اۇجوز ساتمیْشیق

بۇراخین بو شهَر قالمالی دگیل
من گئدیم ایسلانیم یاغیش‌دا، چن‌ده
قۇرتاریم اؤزۆمو پاس‌لی باخیشدان
گۆلۆشۆ پایلاشاق ، آنام ‌دا، من‌ ده

اگر این مطلب را مفید ارزیابی کردید لطفاً به اشتراک بگذارید :