بیرلیک چیلله‌سی / محمد رحمانی فر

بیرلیک چیلله‌سی / محمد رحمانی فر

 

🌚بیرلیک چیلله‌سی
✍️#محمد_رحمانی_فر
🌑#چیلله گئجه‌سینین نه قدر اوزون اولدوغونا باخمایاراق، سونوجدا بو اوزون، قارانلیق گئجه #گونشین دوغولماسی ایله سونا چاتیر. بونا گؤره، بوتون اوزون، قارانلیق گئجه‌لرین بیر گون سونا چاتاجاغینا اینانیرام. یئتر کی اومودوموزو الدن وئرمه‌یک! 🔺یئتر کی آذربایجانیمیز‌دا دونیا #میترائیزم-ینین تملینی قویان ننه-بابالاریمیزا تای، گونش تانریچاسینین قارانلیق گوج‌لرینه اوستون گله‌بیله‌جه‌یی اوچون #ال_بیر اولاق!
🖊ی س:
🔺#آذربایجان میترائیزمی دونیا میترائیزمینین تملی ساییلیر. بو میترائیزمه گؤره، #قارا_اؤکوز (قارانلیق گوج‌لرینین سیمگه‌سی) دونیانی ابدی قارانلیقدا باسدیرماق اوچون، هر گئجه گونشی اوغورلاییب، یئرین آلتیندا قویلاماغا چالیشیر، آنجاق آیدین‌لیق سیمگه‌سی ساییلان #آغ_اؤکوز هر گئجه سحر آچیلانا دک گونشی قارا اؤکوزون الیندن قورتارماق اوچون یئرین آلتیندا اونونلا آغیر ساواش آپاریر. 🔺(سونرالار تورک #ایلام اویغارلیغیندا آغ اؤکوزون یئرینی #آسلان آلیر، داها سونرا ایسه #یونان اویغارلیغیندا اونون یئرینه #انسان اوتورور. بونون اؤزونون ماراقلی آچیقلاماسی وار، آنجاق بو یازینین آماجی بونلاری آچیقلاماق دئییل.)
🌞هر ساباح گونشین یئنیدن #اسارت_دن قورتولدوغونا تانیق اولدوقلارینا باخمایاراق، قارا اؤکوزون بیر گئجه همیشه‌لیک اولاراق آغ اؤکوزه اوستون گلدییینه یول وئرمه‌مک اوچون ننه-بابالاریمیز یئری قازیب هر گئجه یئرین آلتیندا دوزلتدیک‌لری #تاپیناق‌لارا سیغینیب، آغ اؤکوزه اورک وئرمک اوچون #ساری_گلین ماهنیسینی سسلندیریرمیشلر ⚽️(بیزیم بو گون‌لر ایکی داغین آراسیندا یئرلشمیش اولان #قوردلار دره‌سینه ییغیشیب #تراختورا اورک وئردیییمیز کیمی). ☑️دئمک، اونلار قارانلیق‌لارین الیندن بیر یوللوق اولاراق قورتولماغین بیرجه یولونون #بیرلیک‌ده چالیشماقدان کئچدییینه اینانیرمیشدیلار. (بو بیر یئره ییغیشماق، اصلینده بو بیرلیک یاراتماق، بیر عنعنه کیمی هله ده چیلله گئجه‌لرینده گؤزه دَییر.)
🔴بیرلیییمیزی قوروماق هابئله بیرلیکده چالیشماق حتی بیرلیک اوچون چالیشماق، بوگون هر زاماندان آرتیق بیزیم اوچون گرکلی‌دیر. داهی شاعیریمیز #اوستاد_شهریار دئمیشکن : “حیدربابا گؤیلر بوتون دوماندی/ گون‌لریمیز بیربیریندن یاماندی/ بیربیریزدن آیریلمایین آماندی!”

اگر این مطلب را مفید ارزیابی کردید لطفاً به اشتراک بگذارید :